Një delegacion izraelit, i kryesuar nga Ronen Bar, drejtor i Agjencisë së Inteligjencës së Brendshme Izraelite Shin-Bet (Shabak), do të udhëtojë sot në kryeqytetin e Egjiptit, Kajro, për të marrë pjesë në bisedimet për shkëmbimin e të burgosurve dhe menaxhimin e pikës kufitare Rafah, transmeton Anadolu.

Sipas faqes së lajmeve “Walla” të Izraelit, delegacioni izraelit i kryesuar nga drejtori i Shin-Bet Bar do të takohet me zyrtarë në Kajro.

Përveç negociatave për shkëmbimin e të burgosurve, në bisedime do të diskutohet për të burgosurit palestinezë të sigurisë që planifikohen të lirohen si dhe për menaxhimin e ardhshëm të pikës kufitare Rafah.

Pika kufitare Rafah midis Rripit të Gazës dhe Egjiptit është mbyllur që kur ushtria izraelite pushtoi anën palestineze të portës më 7 maj dhe nisi sulm tokësor në zonë. Sulmet shkaktuan reagim intensiv nga Egjipti.

Shefi i Shërbimit të Inteligjencës së Jashtme të Izraelit, Mossad, David Barnea pritet të udhëtojë sërish në kryeqytetin e Katarit, Doha, për të diskutuar mbi propozimin për shkëmbimin e të burgosurve mes Tel Avivit dhe Hamasit./abcnews