Ne Lezhë është kremtuar 580-vjetori i Besëlidhjes mes Princërve të Arbrit, një nga ngjarjet më të rëndësishme të historisë sonë.

Ministri i Punëve të Brendshme të Kosovës, Xhelal Sveçla, ka marrë pjesë në këtë ngjarje të rëndësishme.

Së bashku me drejtuesit e institucioneve të të dy shteteve, me përfaqësuesit nga të gjitha trevat shqipfolëse, kanë shënuar 580 vjetorin e Kuvendit të Lezhës.

Postimi i plotë:

Në Lezhën historike, në Lezhën e bashkimit të shqiptarëve, bashkë me drejtuesit e institucioneve të dy shteteve tona, ministra e deputetë, me kryetar të bashkive e me kryetar të komunave, me përfaqësues nga të gjitha trevat ku flitet shqip, me një varg aktivitetesh shënuam e 580 vjetorin e Kuvendit të Lezhës.

Besëlidhja e Lezhës shërbeu si frymëzim për ngjarje e procese të mëdha, që nga Lidhja e Prizrenit te shpallja e pavarsisë së Shqipërisë, nga lufta e Ushtrisë Çlirimtare të Kosovës te shpallja e pavarsisë së Kosovës.

Kuvendi i 2 marsit të vitit 1444, përtej organizimit e mobilizimit që u kurorëzua me aleancën e parë politiko-ushtarake të shqiptarëve, nën udhëheqjen e të madhit Gjergj Kastrioti – Skenderbeu, ishte mesazh bashkimi për kombin. Nëpër shekuj, ky mesazh, përveç se nevojë, nuk ka rreshtur asnjëherë së ekzistuari edhe si dëshirë. Është obligim i yni, në kohën e sotme, të bëhet detyrë dhe qëllim.

Urime kjo datë historike, ndër më të rëndësishmet e kombit tonë./Arbresh.info/