Kryesuesi i Këshillit Gjyqësor të Kosovës, Albert Zogaj e ka vlerësuar vitin 2023 si vit të zhvillimeve pozitive në sistemin gjyqësor të Kosovës, duke thënë se impenjim kryesor ka qenë reforma në sistemin e drejtësisë.

Në intervistën dhënë RTK-së, Zogaj tha se ka qenë institucioni që ai drejton, i cili e ka nxitur reformën në sistemin e drejtësisë.

“Mund ta konfirmoj që ne kemi qenë institucioni që e kemi nxitur reformën edhe për çështjet që lidhen me procedurat civile, që tashmë po bëhet kodi i procedurës civile në gjykatën administrative dhe reformën për dhomën e posaçme të Gjykatës Supreme. Po ashtu kemi marrë pjesë në hartimin e proces-dokumenteve dhe ligjeve përkatëse për këto çështje”, tha Zogaj.

Tutje, ka thënë, se ka një dakordim të institucioneve për kontekstin e zhvillimeve ligjore qoftë në procese të reja, porse siç tha ai, ka një përjashtim ku institucionet e vendit ende nuk janë dakorduar për verifikimin e kandidatëve për gjyqtar dhe gjyqtarëve në proces.

Megjithatë, Zogaj tha se zotimi i tyre ka qenë që gjithçka që nuk e cenon pavarësinë e gjyqësorit dhe gjithçka që lidhet me frymën e standardeve evropiane për këto koncepte, do të pranohet.

“Kemi efikasitet në shkallën 100%, sipas standardeve të Këshillit të Evropës”, tha Zogaj.