Ministri i Punëve të Brendshme, Xhelal Sveçla ka bërë të ditur se 471 vetura me targa ilegale u konvertuan në targa RKS për 4 ditë.

Sipas tij, kjo është pasi që sot në veri nuk janë më të plotfuqishëm kriminelët si Milan Radojçiq, Llune, Mami, Rusi e të ngjajshëm, shkruan Arbresh.info.

Sveçla tha se mund të duket e paimagjinueshme nga perspektiva e para një viti, por sot në 4 komunat e veriut shërbejnë zyrtarë policorë që janë në shërbim të rendit dhe ligjit e në luftim të kontrabandës, grupeve kriminale e terroriste.

“Se shumica ishin vetë pjesë e krimit e kontrabandës tregon edhe përfshirja e ish-zyrtarëve policorë jo vetëm në rastin e Banjskës.”, shkroi ai në Facebook.

Tutje, ministri Sveçla tha se shteti nuk gjunjëzohet nga grupet e mbështetura nga Qeveria e Serbisë.

“Shteti nuk gjunjëzohet nga banditët e as nga grupet kriminale edhe atëherë kur grupe të mirëorganizuara e mbështetura nga Qeveria e Serbisë synojnë terrorizimin e qytetarëve, cënimin e integritetit dhe sovranitetit të vendit tonë.”, u shpreh Sveçla.

“Ky rezultat është falë angazhimit të pandalshëm të secilit që nuk dorëzohet përballë kërcënimeve, shantazheve e sulmeve por besojnë në drejtësi e barazi.”, përfundoi ai./Arbresh.info/