Gjykata e Apelit ka lënë në fuqi vendimin e Gjykatës Themelore në Prishtinë, me të cilin i është vazhduar masa e paraburgimit edhe për dy muaj tre të dyshuarve Vladimir Toliq, Blagoje Spasojeviq dhe Dushan Maksimoviq, për sulmim terrorist ndaj Policisë së Kosovës në Banjskë.

“Gjykata e Apelit me aktvendimin PN1.S.nr.203/2023, të datës 30.10.2023, i ka refuzuar si të pabazuara ankesat e mbrojtësve të të pandehurve V.T, B.S dhe D.M, ndërsa aktvendimin e Gjykatës Themelore në Prishtinë – Departamenti Special, PPPS.nr.44/2023, e ka vërtetuar”, thuhet në vendimin e Apelit.

Sipas Apelit, Themelorja drejt ka arsyetuar vendimin për caktimin e masës së paraburgimit ndaj Toliq, Spasojeviq dhe Maksimoviq, duke u plotësuar në tërësi kushtet ligjore pë vazhdimin e masës së paraburgimit, raporton “Betimi për Drejtësi“.

Toliq, Spasojeviq dhe Maksimoviq gjenden nën masën e paraburgimit nga data 26 shtator 2023.

Ata dyshohen për veprat penale “Veprat e rënda kundër rendit kushtetues dhe sigurisë së Republikës së Kosovës”, “Sulm kundër rendit kushtetues të Republikës së Kosovës”, “Përgatitja e veprave terroriste ose veprave penale kundër rendit kushtetues dhe sigurisë së Republikës së Kosovës” dhe “Mbajtja në pronësi, kontroll ose posedim të paautorizuar të armëve|.

Në Bajsnkë të Zveçanit, në orët e hershme të 24 shtatorit 2023, ishte vrarë rreshteri Afrim Bunjaku si dhe ishin plagosur dy të tjerë. Pastaj, të vrarë kishin mbetur edhe tre sulmues, kurse të tjerët ishin larguar pasi ishin strehuar për disa orë në Manastirin e Bajnskës.

Ministri i Punëve të Brendshme, Xhelal Sveçla kishte publikuar pamje të Milan Radoiçiq, ku kishte theksuar se Radoiçiq ka qenë udhëheqës i këtij grupi terrorist dhe i sulmit ku mbeti i vrarë polici Afrim Bunjaku.