Rreth deklaratave të djeshme të presidentit serb, Tomislav Nikoliq, në një intervistë për “Sputnik”, i cili tha se Mali i Zi është shembulli më i mirë se si shteti nuk duhet të shndërrohet në një lodër, ka reaguar sot kryeministri i Malit të Zi, Milo Gjukanoviq.

Gjukanoviq tha se është befasuar nga deklaratat e Nikoliqit, por tha se ka lexuar vetëm pjesërisht intervistën.

“Në qoftë se kjo deklaratë është e saktë, unë do të thoja se asnjë deklaratë që vjen si nga Mali i Zi dhe nga jashtë nuk mundet të na trondisë”,tha Gjukanoviç, duke shtuar se Mali i Zi do të vazhdojë procesin për integrim në NATO e BE.

Gjukanoviq tha se nëse këto deklarata janë ashtu siç janë transmetuar nëpër media, atëherë Mali i Zi nuk mund ta pranojë një ton të lartë të Nikoliqit siç ishte ai në deklaratat e djeshme.

Ndërsa, presidenti i Malit të Zi, Filip Vujanoviq, ka thënë se nuk është befasuar nga deklaratat e Nikoliqit. Ai e kritikoi Nikoliqin për ndryshime drastike të qëndrimeve të tij.