Qeveria e Shqipërisë do të japë shpërblime në fundvit për pensionistët dhe familjet në nevojë. Lajmi i mirë është bërë i ditur nga kryetari i Komisionit të Ekonomisë, Erjon Braçe, i cili tha se brenda këtyre ditëve do publikohen të dhëna konkrete mbi shumën e përfitimit dhe kategoritë konkrete. Por, nëse për këto kategori do të aprovohet një fond, i cili do të shpërndahet për të gjithë, ndryshe do të jetë skema e bonusit për administratën.

Sipas Braçes, do të jenë performancat e punonjësve, ato që do të përzgjedhin, se kush do të marrë shpërblim dhe kush jo, ndërkohë që për zbardhjen e fondit total të shpërblimeve do të jenë 3 ministritë e linjës që do ta shpallin atë, shkruan Shekulli.

“Në dijeninë time, ministrat respektivë që mbulojnë fushën, ministri i Mirëqenies Sociale, ministri i Financave dhe ai i Ekonomisë po merren me shqyrtimin e kësaj çështjeje dhe unë besoj që qeveria do të ketë një lajm shumë të mirë për të gjithë shtresën e pensionistëve, invalidëve etj., të cilët përfshihen në grupin e shtresave sociale që trajtohen nga Ministria e Mirëqenies Sociale dhe Rinisë”, tha ai. Ndërkohë, i pyetur për bonuset që do të ndahen veçanërisht për administratën, ai u tregua disi i ashpër, teksa theksoi se jo të gjithë e meritojnë.

“Administrata duhet që të marrë shpërblim vit për vit? Unë nuk besoj se ky duhet të jetë trendi i sjelljes tonë me paranë publike veçanërisht për administratën, apo për sektorë që nuk kanë përmbushur detyrimet e tyre, në raport me ligjet, dhe në raport me performancën e vendosur. Kjo do të thotë se edhe vitin që shkoi, ne nuk shpërblyem në total administratën. Kemi shpërblyer vetëm në sektorë si arsimi, shëndetësia, mjedisi, Policia e Shtetit, etj. me radhë që kanë pasur rezultate dhe kontribute gjatë vitit ushtrimor dhe buxhetit të shtetit në vitin 2014”, ka thënë deputeti socialist.

Në komisionin e Ekonomisë, dje u shqyrtuan e u votuan një për një të 20 nenet e projektligjit “Për Buxhetin e vitit 2016”, ku, në fillim të seancës, relatori Anastas Angjeli, duke iu referuar kërkesave të bëra më herët nga institucionet për fonde shtesë, bëri të ditura ndryshimet. “Kuvendit i shtohen 140 milionë lekë, Kontrollit të Lartë të Shtetit i shtohen 88 milionë lekë, Gjykatës Kushtetuese i shtohen 4 milionë. Po ashtu, fondi prej 50 milionë lekësh i hiqet Ministrisë së Mjedisit dhe i shtohet Ministrisë së Jashtme”. Angjeli specifikoi edhe transferimet e fondeve për disa nga bashkitë e vendit, si dhe disa rregullime në transfertat e pakushtëzuara për rishpërndarjen e punonjësve.