Në debatin për liberalizimin e vizave “Liberalizimi i vizave për Kosovën. Fillimi i fundit?”, gazetari i njohur, Agustin Palokaj, tha se tashmë janë ditët e numëruara deri në vendimin për heqjen e vizave për Kosovën, dhe për këtë, sipas tij, ka ndikuar situata në Ukrainë dhe suksesi në pranimin e migrantëve nga Lindja e Mesme.

“Situata në Ukrainë ka nxitur vullnetin politik për të përmbyllur procesin e liberalizimit të vizave për Kosovën, i cili tashmë është stërzgjatur. Gjithashtu, në këtë proces ka ndikuar edhe pranimi i migrantëve të huaj nga Lindja e Mesme, ku Kosova ka sukses në pranimin e migrantëve. Tanimë mund të themi se nuk ka dyshim apo parashikim, por ka ditë të numëruara deri në përfundim të këtij procesi, i cili pritet të ndodhë për një kohë të shkurtër, pra, në fund të këtij viti”, tha ai.

Palokaj theksoi se demarkacioni me Malin e Zi nuk ka qenë kurrë arsye për shtyrjen e liberalizimit, por ai është përdorur nga ish-qeveritarët në Kosovë.

Sipas tij, Kosova e ka paguar çmimin e azilkërkuesve të shumtë nga Shqipëria, pas liberalizimit të vizave për ta.

“Unë jam i bindur se nuk ka qenë aspak demarkacioni me Malin e Zi arsye për hezitimin e BE-së për vizat, por ai është përdorur nga qeveritarët në Kosovë, sepse, edhe Gjeorgjia me Ukrainën nuk kanë qenë pa probleme territoriale kur u janë liberalizuar vizat, por, atyre nuk u është kërkuar demarkim i kufirit. Gjithsesi, jam i bindur se problem ka qenë numri i madh i azilkërkuesve në atë kohë nga Shqipëria, të cilit përkundër liberalizimit migronin me të madhe në Itali dhe Britani të Madhe, e për të gjitha këto çmimin e ka paguar Kosova”, pohon ai.

Palokaj shtoi se tensionet e fundit në veri të vendit, mund të ndikojnë që të shtyhet ky proces.

“Tensionet e mundshme në veri të Kosovës, mund të ndikojnë në mendësinë evropiane, për shkak që ekziston mendimi se sa më shumë tensione të ketë, edhe mundësia e migrimit të pakontrolluar është më e madhe. “ – shtoi ai./arbresh.info/