Krasniqi: Edi Rama, fat i madh për Kosovën në këtë periudhë sfiduese

17:34 | 12 Tetor 2022
E.H

Lideri i Partisë Demokratike të Kosovës, Memli Krasniqi, ka përshëndetur fjalimin e kryeministrit të Shqipërisë, Edi Rama përballë anëtarëve të Këshillit të Evropës.

Krasniqi ka konsideruar se udhëheqja e Edi Ramës me Shqipërinë është fat i madh për Kosovën.

Sipas tij, Rama po i shfrytëzon të gjitha mundësitë për t’i dalë në mbrojtje Kosovës.

“Është fat i madh për Kosovën që në këtë periudhë sfiduese, Shqipëria ka një kryeministër si Edi Rama – i cili nuk e humb asnjë mundësi që i jepet për të mbrojtur Kosovën, luftën tonë çlirimtare dhe të drejtën tonë të patjetërsueshme për liri dhe pavarësi. Populli i Kosovës të është mirënjohës!”.

Ndryshe, në fjalimin e tij, Rama ka kërkuar që ndërkombëtarët t’i referohen Kosovës si “Kosova” e jo “Kosovo”, kundërshtoi raportin e Dick Martyt si dhe ndau disa fjalë për ish-presidentin Hashim Thaçi./arbresh.info/