Kryeministrja e Suedisë Magdalena Andersson gjatë një konferencë të përbashkët me ministrin e jashtëm ukrainas Dmytro Kuleba, premtoi një paketë të re ndihme për Kievin.

Kjo paketë përfshin ndihmë ushtarake me vlerë 500 milionë korona (46.8 milionë dollarë), si dhe të njëjtën shumë për rindërtimin e Ukrainës.

“Suedia do të vazhdojë të jetë një mike e ngushtë dhe të mbështesë Ukrainën”, tha Andersson.

Ministrja e Jashtme suedeze, Ann Linde, e cila ishte gjithashtu e pranishme në konferencën për shtyp, shtoi: Nuk e dimë se sa do të zgjasë lufta e Rusisë, por Suedia është e gatshme të ofrojë mbështetje afatgjatë për Ukrainën.

Kuleba i Ukrainës e shfrytëzoi vizitën e tij në Stokholm për të falënderuar liderët suedezë për atë që ka bërë vendi që kur Rusia filloi agresionin mbi Ukrainën në shkurt, por edhe për të kërkuar mbështetje të vazhdueshme.

“Për sa kohë që lufta të vazhdojë, ne do të kërkojmë më shumë armë”, ka theksuar Kuleba.

Angazhimi i ripërtërirë vjen pasi raportet treguan se mbështetja ushtarake nga fuqitë e mëdha evropiane, si Gjermania dhe Franca, është ngadalësuar muajt e fundit, ndërsa Ukraina thuhet se po përgatitet për një kundërsulm.