Grupet e të drejtave të njeriut, në bashkëpunim me artistin gjerman Volker-Johannes Trieb, kanë ekspozuar 6500 thasë me rërë që duken si top futbolli përpara selisë së FIFA-s në Cyrih.

Ata e bëjnë këtë si protestë kundër zhvillimit të Kupës së Botës në Katar. Topat janë shtypur me tekstin ‘ndërgjegje botërore, je një njollë turp’.

Artisti Volker-Johannes Trieb, i cili inicoi protestën, tha se punëtorët “trajtoheshin si skllevër” dhe se ata “po vdisnin nga nxehtësia.

“Shumë mijëra njerëz vdiqën në Katar duke ndërtuar stadiume për Kupën e Botës. Ata trajtoheshin si skllevër dhe vdisnin nga vapa, rraskapitja ose mungesa e masave të sigurisë. Kjo u pranua nga FIFA dhe qeveria në Katar”, ka thënë Trieb në një deklaratë.

Sipas The Guardian, rreth 6500 punëtorë kanë vdekur në ndërtimin e stadiumeve.

Sipas autoriteteve të Katarit, kjo shkallë vdekshmërie nuk është e lartë, duke qenë se në Lindjen e Mesme janë rreth 1.4 milionë punëtorë nga Azia Juglindore.