Mëngjesin e sotëm, forcat speciale amerikane kanë kryer një operacion për të cilin Pentagoni tha se ishte bastisje kundër terrorizmit në verilindje të Sirisë.

Pjesëtarët e ekipeve emergjente, që shkuan në vendin e ngjarjes, raportuan për 13 persona të vrarë, përfshirë gjashtë fëmijë dhe katër gra, shkruan Associated Press, transmeton arbresh.info

Operacioni, për të cilin banorët thanë se zgjati më shumë se dy orë, e “shkundi” fshatin Atmeh, afër kufirit me Turqinë, ku ka kampe për personat e zhvendosur nga lufta civile e Sirisë.

“Misioni ishte i suksesshëm. Nuk pati pasoja për ShBA-në. Të dhëna shtesë do të jepen, kur të jenë të gatshme”, tha zëdhënësi i Pentagonit, John Kirby.

Një gazetar i agjencisë “Associated Press” dhe disa banorë thanë se kanë parë pjesë trupash të shpërndara afër vendit të bastisjes, një shtëpi në provincën Idlib, që kontrollohet nga rebelët.

Një zyrtar i inteligjencës irakiane, që ka kontakte me koalicionin e udhëhequr nga ShBA-ja, tha se cak i operacionit ishte një udhëheqës i lartë i militantëve, identiteti i të cilit do të publikohet më vonë nga Shtëpia e Bardhë. / arbresh.info/