Për shkak të motit dhe temperaturave të ngrohta në Afrikën e Veriut, pluhuri atje është ngritur deri në pesë kilometra në ajër dhe është bartuar nga era e jugut në Evropë, pra edhe në Zvicër.

Ky pluhur nga shkretëtira afrikane ka errësuar të shtunën qiellin në disa vende në Zvicër, shkruan sda.

Pluhuri, si i tillë, nuk përbën problem problem për njerëzit, por vetëm krijon më shumë re në qiell.

Pas një përqendrimi të shtuar të pluhurit të premten, edhe më shumë pluhur saharian në Zvicër pati të shtunën, njoftoi Meteoschweiz në Twitter, transmeton albinfo.ch. Për pasojë, pamja në disa vende ishte e mjegullt dhe drita kishte një “kornizë” të verdhë.

Sipas SRF Meteo, pluhuri vjen kryesisht nga shtetet veriperëndimore të Afrikës, Mauritania, Mali dhe Algjeria.

Grimcat e pluhurit në ajër janë një faktor shtesë i pasigurisë për parashikimin e motit. Ato gjithashtu mund të nxisin formimin e reve.

Sidoqoftë, pluhuri Saharian duket të ketë një ndikim të papërfillshëm në shëndetin e njerëzve. Pluhuri i imët natyral përbën rreth një për qind të përqendrimit total të pluhurit të imët.

Një front i ftohtë pritet të godasë Zvicrën të Dielën. Me reshjet e tyre dhe ndryshimin e masës së ajrit, pluhuri, sipas Meteoschweiz, hiqet përsëri nga atmosfera mbi Zvicër.