Këshilli i Ambasadorëve Shqiptarë përshëndet marrjen e presidencës së radhës të BE-së nga Gjermania si dhe shpreh entuziazmin për programin tërësor të kësaj Presidence.

Nisur nga katalogu i gjerë me një problematikë shpërthyese për shumë çështje, si për BE-në dhe jashtë saj, kjo Presidencë nga shteti më i madh dhe më i fuqishëm në Evropë, model i demokracisë dhe solidaritetit, përbën një fat dhe ngjarje me rëndësi dhe efekte madhore për tani dhe të ardhmen e kontinentit tonë dhe shumë më gjerë.

Këshilli i Ambasadorëve Shqiptarë i uron kësaj Presidence sukses të plotë, në radhë të parë në menaxhimin efektiv të pandemisë COVID – 19, krizës më të madhe pas Luftës së II Botërore me pasoja tashmë të njohura.

Shprehim bindjen se me lidershipin e saj, Kancelarja Merkel do të arrijë konsensusin e nevojshëm për zbatimin sa më shpejt të projektit gjigant që ajo lançoi me Presidentin Macron më 18 Maj e të mbështetur nga Komisioni Evropian, si ndihma dhe subvencione pa kthim prej 750 Miliard Euro, diçka që ndodh për herë të parë në historinë e BE-së.

Presidenca gjermane vjen në një kohë kur Ballkani Perëndimor ndeshet me shumë sfida serioze. Ngjarjet e ditëve të fundit, me ngritjen e akt-akuzave tejet të rënda ndaj liderëve kryesorë të Kosovës nga Prokuroria Speciale e Hagës e bën dhe më të domosdoshëm rifillimin dhe nxitjen e dialogut Kosovë – Serbi në bashkëpunim me SHBA-të, në pritje dhe të Samitit të parashikuar më 17 Korrik në Paris.

Me këtë rast, KASH inkurajon përshpejtimin dhe realizimin brenda këtij viti të liberalizmit të vizave me Kosovën.

Këshilli i Ambasadorëve Shqiptarë ka besim se ashtu si dhe deri tani, edhe gjatë presidencës së saj të BE-së, Gjermania dhe Kancelarja Merkel, mikeshë e madhe e vendit tonë do t’i kushtojë përparësinë e duhur përshpejtimit të çeljes së negociatave të anëtarësimit në BE.

Ndërkohë, Këshilli i Ambasadorëve Shqiptarë i bën thirrje Qeverisë, diplomacisë dhe gjithë organizmave të tjera përkatëse në vend që të intensifikojnë dhe konkretizojë përmbushjen e kushteve tashmë të njohura, me qëllim që presidenca gjermane në vjeshtë të jetë në gjendje të ndezë dritën jeshile për thirrjen e Konferencës së Parë Ndërqeveritare brenda këtij viti./arbresh.info/