Të paktën tre persona janë vrarë, përfshirë dy ushtarë amerikanë dhe 10 janë plagosur pas sulmit me raketa në kampin Taji, ku janë të vendosura trupat e huaja.

Zyrtarët amerikanë të cituar nga media thanë të mërkurën se një tjetër nga të vdekurit ishte një shtetas britanik, transmeton portali arbresh.info.

Sulmi me raketa ishte i 22-ti kundër interesave ushtarake amerikane në vend që nga fundi i tetorit, tha një komandant ushtarak irakian.

Koloneli i ushtrisë amerikane Myles Caggins, një zëdhënës i ushtrisë amerikane në Irak, tha në Twitter më shumë se 15 raketa të vogla goditi bazën, por nuk dha detaje të tjera.

Një zyrtar amerikan, duke folur për Associated Press në kushte anonimiteti, tha se më shumë informacion do të jepej më vonë në një njoftim zyrtar.

Kampi Taji, i vendosur vetëm në veri të Bagdadit, është përdorur si një bazë trajnimi për disa vite. Ka rreth 6.000 trupa amerikane në Irak, duke trajnuar dhe këshilluar forcat irakiane dhe duke kryer misione kundër terrorizmit.

Sulmet e mëparshme me raketa që synonin ushtarët, diplomatët dhe objektet amerikane në Irak vranë një kontraktues amerikan dhe një ushtar irakian. Asnjë prej sulmeve nuk është pretenduar, por Uashingtoni akuzon fraksionet pro-Irani si përgjegjëse./arbresh.info/