Diplomati rus Lev Dengov vlerëson se fillimi i armëpushimit në Libi varet nga gjenerali puçist Khalifa Haftar, pasi ai e ka filluar sulmin, raporton Anadolu Agency (AA).

Kreu i grupit rus të kontaktit për marrëveshjen brenda-libiane, Dengov tha se Rusia punon që të sigurohet që të gjitha palët në konfliktin libian do të pranojnë sugjerimin për armëpushim të bërë të mërkurën nga presidentët e Rusisë dhe Turqisë.

“Pas takimit të liderëve të Rusisë dhe Turqisë, pjesa perëndimore e Libisë pranoi që Rusia është një mike dhe partnere e besueshme që i arrin qëllimet e saj”, tha Dengov.

“Jepuni fund thashethemeve se Rusia gjoja mbështet një nga palët në konflikt në Libi. Qëllimi kryesor dhe i vërtetë i vendit tonë sot është kërkimi i një zgjidhjeje paqësore dhe kjo është konfirmuar nga të gjitha palët në konflikt. Tani do të jetë shumë më e lehtë për ne të punojmë në këto kushte dhe do të jetë më e lehtë të arrihet një zgjidhje paqësore në një atmosferë të mirëkuptimit dhe miqësisë”, tha ai.

Presidenti i Turqisë, Recep Tayyip Erdoğan dhe presidenti i Rusisë, Vladimir Putin kanë bërë thirrje për armëpushim në Libi përmes një deklarate të përbashkët pas një takimi në Stamboll, duke riafirmuar “përkushtimin e tyre të fuqishëm për sovranitetin, pavarësinë, integritetin territorial dhe unitetin kombëtar të Libisë”.

Në muajin prill, forcat e Haftarit filluan një fushatë ushtarake për të marrë kontrollin në Tripoli nga Qeveria e Pajtimi Kombëtar (GNA) që është e njohur nga OKB-ja.

Sipas OKB-së, më shumë se 1.000 persona kanë humbur jetën që nga fillimi i operacionit ndërsa mbi 5.000 të tjerë janë plagosur.

Më 2 janar, Parlamenti i Turqisë kaloi mocionin që i lejon të dërgojë trupa pas kërkesës së GNA-së, e cila është rrethuar nga forcat e gjeneralit puçist Khalifa Haftar.

Forcat e Haftarit, të mbështetura nga Egjipti dhe Emiratet e Bashkuara Arabe, kanë bërë përparime të rëndësishme në javët e fundit.