Drejtori i Përgjithshëm i Doganave, Arlind Gjokuta, ka bërë me dije rezultatet e kontrolleve për kompanitë që tregtojnë naftë dhe gaz të lëngshëm në vend.

Si rezultat i këtij procesi kanë rezultuar mangësi nga gjendja e deklaruar te të gjithë operatorët që operojnë me karburant në magazinat e lira, 1 operator që operon me gazin natyral të lëngshëm dhe 1 rafineri prodhimi, më konkretisht si më poshtë:

–        ROYAL TRADE COMPANY sha

–        PORTO ROMANO OIL sha

–        GENKLAUDIS sha

–        EUROPETROL sha

–        EROIL sha

–        BOLUNMEZ PETROL sha

–        LA PETROLIFERA ITALO – ALBANESE sha

–        MARE OIL Sh.A

–        TOSK ENERGJI Sha,

Në total, nga i gjithë procesi i kontrollit rezultuan diferenca për:

–        752,015 litra karburant dhe

–        77,451 litra gaz.

Në total detyrimi i munguar dhe penalitetet për këto sasi janë rreth 129 mln lekë (1.06 mln euro).

“Kontrolli u krye për periudhën  2018 – deri në  gusht 2019, dhe konsistoi në krahasimin e  të dhënave të sistemit informatik doganor, matjeve fizike të vitit 2018 me gjendjet e matjeve fizike të kryer nga grupi i kontrollit, duke shtuar veprimet doganore të periudhës në kontroll. Grupi i kontrollit gjithashtu, përllogariti dhe analizoi firot natyrore e teknike të njohura sipas bazës ligjore në fuqi”, bëri me dije drejtori Gjokuta.

Për shkak të këtyre shkeljeve, ka nisur procesi i verifikimit të përgjegjësive brenda administratës doganore. Aktualisht janë liruar nga detyra 5 doganierë mbikëqyrës, janë thirrur në komisionin disiplinor 9 doganierë të tjerë.

Kontrolli është kryer në:

–        8 magazina të lira për karburantet me vendndodhje në Porto Romano, Lezhë dhe Vlorë

–        4 magazina të lira për produktin Gaz i Lëngshëm Natyror me vendndodhje në Vlorë dhe Porto Romano

–        Si edhe 3 rafineritë e përpunimit të naftës bruto në Fier, Ballsh dhe Elbasan.