Presidenti, Hashim Thaçi, thotë se ka qenë i tmerruar me moskonsultimin e Shteteve të Bashkuara të Amerikës në lidhje me Samitin e Berlinit.

“Kam qenë i tmerruar kur para shkuarjes në Samitin e Berlinit është konstatuar se Shtetet e Bashkuara të Amerikës nuk kanë qenë të informuara dhe të konsultuara për Samitin e Berlinit,” është shoprehur Thaçi para të pranishmëve në Samitin Brdo-Brijuni, shkruan arbresh.info.

Sipas tij, në të kaluarën në Ballkanin Perëndimorë pa ShBA-të nuk është arritur asnjë marrëveshje, as Dejtoni, as Rambujeja, e as një marrëveshje tjetër.

“E kuptoj pse nuk mund të jetë në tavolinë, por procesi që është zhvilluar deri më tani dhe i udhëhequr nga zonja Mogherini së paku ka qenë i konsultuar dhe i koordinuar ngushtë, me Shtetet e Bashkuara të Amerikës,” është shprehur Thaçi para homologëve të tij.

Këto komente ai i ka bërë në Samitin e radhës së Liderëve të Procesit të Brdo-Brijunit, të mbajtur në Tiranë.

Procesi i Brdo-Brijunit është një nismë rajonale bashkëthemeluar nga Presidentët slloven dhe kroat në vitin 2010, shkruan arbresh.info.

Me ftesën edhe të Presidentes së Kroacisë, Kolinda Grabar-Kitarović dhe të Presidentit të Sllovenisë, Borut Pahor, në Samitin e Tiranës, po marrin pjesë tre Anëtarët e Kryesisë së Presidencës së Bosnje-Hercegovinës, Milorad Dodik, Šefik Džaferović dhe Željko Komšić, Presidenti i Kosovës, Hashim Thaçi, Presidenti i Malit të Zi, Milo Đukanović, Presidenti i Maqedonisë së Veriut, Gjorge Ivanov, si dhe Presidenti i Serbisë, Aleksandar Vučić.

Të ftuar nderi janë Presidenti i Polonisë, Andrzej Duda, dhe Përfaqësuesja e Lartë e Bashkimit Evropian për Punët e Jashtme dhe Politikën e Sigurisë dhe Zëvendës Presidente e Komisionit Evropian, Federica Mogherini.

Samiti i Liderëve në Tiranë, që përkon dhe me “Ditën e Evropës”, synon të përçojë një mesazh të rëndësishëm politik lidhur me aspiratën e përbashkët të vendeve të rajonit për t’u integruar në Bashkimin Europian, shkruan arbresh.info.

Kjo nismë ka shërbyer si forum i rëndësishëm i nivelit më të lartë politik për nxitjen e dialogut, bashkëpunimit, forcimit të sigurisë dhe stabilitetit, dhe mbështetjen e proceseve europiane dhe euroatlantike të të gjitha vendeve të rajonit. Një tregues domethënës e jetik për vende tona ka qenë mbështetja e vazhdueshme që drejtues të lartë evropianë dhe amerikanë i kanë dhënë këtij Procesi.

Në mbyllje të Samitit, Liderët e procesit do të miratojnë një dokument me konkluzionet e takimit./arbresh.info/