Miralem Pjanic e ka pranuar se ai nuk e di të ardhmen e vet, nëse do të qëndrojë apo të largohet nga Juventusi në verë, duke sugjeruar se kjo pyetje t’i shtrohet klubit e jo atij.

Pjanic i ka fituar tre tituj rresht në Serie A me Juventusin, që prej se iu bashkua atij nga Roma në vitin 2016, por besohet se bardhezinjtë do ta ndryshojnë skuadrën në verë pas një sezoni tjetër zhgënjyes në Ligën e Kampionëve, transmeton Gazeta Express.

Në një intervistë për Tuttosport, mesfushori boshnjak tha se është i lumtur që është pjesë e klubit nga Torino, por këmbënguli se nuk e di të ardhmen e vet.

“Ka shumë futbollistë të mirë dhe të fortë në Juventus. Unë jam i lumtur që jam këtu. Vit pas viti, unë jap më të mirën nga vetja dhe po rritëm”, tha Pjanic.

“Nuk e di se çfarë do të ndodhë me mua. Duhet ta pyesni klubin, jo mua”, insistoi ai.