Zyrtarët e sigurisë në Sri-Lankë kanë paralajmëruar se militantët islamikë që kryen sulmet e përgjakshme janë duke planifikuar sulme tjera dhe ata mund të jenë të veshur me uniforma ushtarake.

Burimet e sigurisë kanë njoftuar se këto sulme mund të ndodhin të dielën ose të hënën e ardhshme.

“Mund të ndodhë një valë tjetër e sulmeve. Informatat tona tregojnë se sulmuesit mund të vishen si ushtarë dhe të kryejnë sulme përmes një veture”, tha udhëheqësi i divizionit ministror për siguri në kuadër të policisë së Sri-Lankës.

Dy ministra të kabinetit qeveritar dhe dy deputetë të opozitës kanë konfirmuar se janë informuar për alarmin e sigurisë. “Jemi informuar për këtë nga divizioni për siguri”, tha ministri i shëndetësisë, Rajitha Senaratne.

Qeveria ua ka ndaluar grave myslimane mbulimin e plotë të fytyrës sipas ligjit për emergjenca, i cili u fut në fuqi menjëherë pas sulmeve. Brenda komuniteti mysliman ka pasur shqetësime se kjo ndalesë mund t’i rrisë tensionet në shtetin multietnik.

Shumë banorë të Sri-Lankës besojnë se përçarja e madhe mes presidentit Maithripala Sirisena dhe kryeministrit Ranil Wickremesinghe ka ndikuar shumë në dobësimin e sigurisë kombëtare, shkruan “Reuters”, transmeton Gazeta Express.