Presidenti Donald Trump tha të hënën se ende nuk është i kënaqur me atë që ka dëgjuar nga Arabia Saudite për vrasjen e gazetarit Jamal Khashoggi, por nuk dëshiron që SHBA të humbasin investimet në Riad.
Khashoggi, gazetar që shkruante për “Washington Post-in” dhe kritik i Princit të Kurorës Mohammed bin Salman, sundimtari de facto i mbretërisë, u zhduk tre javë më parë pasi hyri në konsullatën saudite në Stamboll për të marrë dokumente për martesën e tij të ardhshme.

Riadi fillimisht mohoi se dinte gjë për fatin e tij, por pastaj pohoi se gazetari ishte vrarë gjatë një përleshjeje brenda në konsullatë, një reagim ky i përshëndetur me tone skeptike nga disa qeveri perëndimore, duke i tensionuar marrëdhëniet me eksportuesin më të madh të naftës në botë.

“Nuk jam i kënaqur me atë që kam dëgjuar,” u tha Presidenti Trump gazetarëve në Shtëpinë e Bardhë. “Nuk dua të humbas gjithë këtë investim që është bërë në vendin tonë. Por ne do t’i shkojmë kësaj deri në fund.”

Presidenti tha se kishte folur me princin e kurorës. Ai tha gjithashtu se në Arabinë Saudite ka amerikanë që po punojnë për çështjen dhe po ashtu edhe në Turqi. Ata do të kthehen në SHBA të hënën mbrëma ose të martën, tha ai.