Por, kryeministrja britanike nuk mund ta dinte çfarë do të humbiste, kur 4 kolegë zbarkuan papritur dhe pa plan në një “pub” të famshëm në Bruksel për birra dhe patate të skuqura.

Pas bisedimeve pa asnjë rezultat të darkës së “Brexit”-it, të mërkurën, presidenti francez, Emmanuel Macron, si dhe Kancelarja gjermane, Angela Merkel, u kthyen bashkë për në hotel.

Por, ndërsa ishin ende në rrugët e Brukselit, Macron mori një “SMS” nga kryeministri i Luksemburgut, Xavier Bettel: Ejani, bashkohuni me ne!

Pak minuta më vonë, Macron, Merkel, Bettel dhe kryeministri belg, Charles Michel, u ulën në një tryezë në sheshin e madh të qytetit, me birra në duar.

Gazetarët nuk ishin të ftuar, në këtë dalje në dukje spontane, por sidoqoftë, një foto në telefon celular, nga një gazetar i rastësishëm aty, është shkrepur dhe është shpërndarë me shpejtësi rrufè në Twitter.

“Pimë një birrë si kolegë, natën e kaluar, dhe patate të skuqura po ashtu, sepse në fund të fundit ishim në Bruksel. Ishte shumë e këndshme”, tha Bettel më pas, duke shtuar se kishin folur pak për zhvillimet e ditës, e më shumë ishin relaksuar së bashku.

“Pagova unë, – tha kryeministri i Luksemburgut, – për shkak të zgjedhjeve të së dielës”. Partia e tij doli mirë në votime dhe ai fitoi një tjetër mandat.