Drejtuesit e Koalicionit PDK-AAK-Nisma, kanë nënshkruar memorandum mirëkuptimi me Bashkimin e Sindikatave të Pavarura të Kosovës (BSPK).

Kadri Veseli tha se ky nënshkrim i memorandumit është vetëm fillimi pjesa e asaj se çka do të ndodhë me Fillimin e Ri pas datës 11 qershor.

“Ky memorandum nënkupton rritjen e cilësisë për punëtorët, respektim i kontratave, siguron që brenda tre muajve do të kalon ligji për stazhin e punës për punëtorët e viteve 90-ta”, ka thënë Veseli.

Kandidati për kryeministër, Ramush Haradinaj, tha se obligimet që i kanë marrë me këtë memorandum është marrëveshja kolektive, porse përfshin edhe rritjen e pagës, rritjen e pensionit dhe po ashtu kërkesa që ka të bëjë Bashkimin e Sindikatave të Pavarura, raporton Ekonomia Online.

Kurse kryetari i BSPK-së, Haxhi Arifi ka thënë se shpreson se kërkesat e kamotshme të tyre më në fund do të realizohen.

“Shpresoj që këto kërkesa nuk do të jenë barrë e juaja por do të jenë që Bashkimin e Sindikatave ta fuqizoni. Kemi punuar aq sa kemi mundur. Do të jemi ata që do të dialogojmë”, ka thënë ai./EkonomiaOnline/