Tyler Adams do të ketë një motiv shtesë për të lënë gjurmë të hënën mbrëma, kur Bournemouth përballet me Manchester United në Old Trafford.

Emri i Adams ka dalë në diskutime brenda Manchester United si një nga objektivat e mundshëm për mesfushën, qoftë në afatin e janarit apo verën e ardhshme.

Me një vlerë rreth 40 milionë paund, ai konsiderohet një alternativë më e përballueshme krahasuar me emra si Carlos Baleba, Elliot Anderson dhe Adam Wharton.

Në moshën 26-vjeçare, lojtari nga Neë Yorku është i entuziazmuar për përballjen direkte me Bruno Fernandes dhe Casemiro, ky i fundit që rikthehet pas pezullimit.

Adams e ka pranuar hapur se Old Trafford mbetet një stadium i veçantë për të. Ai ka luajtur aty edhe më parë me RB Leipzig gjatë periudhës së Covidit, përvojë që, sipas tij, e bindi se Premier League është niveli ku dëshironte të ishte.

Rikthimi i vazhdueshëm në atë stadium dhe rezultatet pozitive e bëjnë këtë përballje edhe më të veçantë.

Në aspektin statistik, Adams është ndër më të mirët e kampionatit në rolin e numrit 6. Ai ka realizuar më shumë ndërprerje se çdo mesfushor tjetër në Premier League këtë sezon, përjashtuar vetëm Moises Caicedo, dhe renditet i shtati për numrin total të ndërhyrjeve, duke përfshirë edhe mbrojtësit.

Muajin e kaluar tregoi edhe një tjetër dimension të lojës së tij, duke shënuar një gol spektakolar ndaj Sunderland, kur nga gjysma e fushës lobi portierin nga brenda rrethit qendror. Goli u votua më i miri i muajit në nëntor.

Një figurë kyçe e përfaqësueses së SHBA-së, Adams po pret me padurim një verë të madhe, me Kupën e Botës që do të zhvillohet në vendin e tij, si dhe Meksikë e Kanada, dhe ajo verë mund të bëhet edhe më e rëndësishme nëse Manchester United vendos të bëjë lëvizjen e radhës./Arbresh.info