VAR-i nuk punon në ndeshjen Rayo-Barcelona, një penallti e dyshimtë

22:46 | 31 Gusht 2025
D.H

Barcelona po avancon me rezultat minimal 1-0 ndaj Rayo Vallecanos pas 45 minutave të para.

Ndeshja e cila po zhvillohet në kuadër të javës së tretë në La Liga u përcoll me polemika të shumta, kryesisht për shkak të penalltisë së akorduar në favor të blaugranasve.

Në minutën e 40-të pas një ndërhyrje ndaj Yamal brenda zonës, gjyqtari i ndeshjes Mateo Busquets Ferrer akordoi penallti.

Shumëkush mund të argumentojë nëse pati kontakt të mjaftueshëm që të ipet penallti, por gjyqtari u duk sikur nuk dëshironte asistencën nga VAR-i.

Megjithatë, pas përfundimit të pjesës së parë u bë e ditur se sistemi VAR në stadiumin e Vallecanos nuk është duke punuar.

Kjo do të thotë se gjyqtari është detyruar të marrë një vendim bazuar nga ajo që ka parë në pamje të parë.

Vendasit ishin tejet të frustruar me vendimin e gjyqtarit dhe ky i fundit u detyrua të shpërndajë disa kartonë të verdhë.

 

Shpërndaje në rrjete sociale