Kampionia e Kosovës, Trepça sonte nis ciklin kualifikues për Ligën e Kampionëve.

Mitrovicasit do të kërkojnë të shkruajnë historinë e basketbollit kosovar, për t’u inkuadruar në fazën e grupeve të Ligës së Kampionëve, por do të kenë punë të madhe, pasi fillimisht i duhen ta eliminojnë kampionin e Holandës, Heroes Den Bosçh, shkruan Arbresh.info.

‘Xehetarët’ ndeshjen e parë me kampionët e Holandës e luajnë sonte me fillim nga ora 20:00 me kohën tonë lokale, ku fitorja është obligim. Një triumf i sotëm Trepçën e dërgon në gjysmëfinale të kualifikimeve për BCL, ndërsa humbja do të thotë eliminim.

Ndeshja luhet në Samokov të Bullgarisë, por palestra do të jetë e mbushur me tifozë mitrovicas, me atmosferën që do t’i ngjasoj “Minatorit”.

Mbështetje të madhe pritet të kenë edhe nga tifozëria zyrtare “Torcida”, e cila ka udhëtuar drejt Bullgarisë me numër të madh.

Nëse, Trepça arrin ta eliminojë Den Boschin, pengesa e radhës do të jetë fituesi i takimit Bakken Bears (Danimarkë) – Kutaisi (Gjeorgji).

Ndërsa në ndeshjen e tretë potenciale takohet me BC Kalev/Cramo (Estoni) – Levice (Sllovakia). Pra, Trepçës i duhen tri fitore për t’i arritur grupet e Ligës së Kampionëve.

Kujtojmë se kjo është hera e dytë me radhë që Trepça po merr pjesë në kualifikimet për BCL, herën e fundit arriti fitore në takimin e parë, por u mposht nga Nymburku i Çekisë, në përballjen e dytë.

Ndeshja mes Trepçës dhe Den Bosch, transferohet në kanalin zyrtar të FIBA-s në Youtube.