Kampionia e Kosovës, Trepça dhe nënkampioni Bashkimi sonte luajnë përballjet e dyta në garën prestigjioze evropiane FIBA Europe Cup.

Të dy skuadrat kërkojnë sonte fitoret e para pasi në ndeshjet e para u mposhtën, shkruan Arbresh.info.

Mitrovicasit do të përballen me Braunschweigun në “Minatori” me fillim nga ora 18:30.

‘Xehetarët’ takimin e parë e luajtën mjaft mirë ndaj PAOK-ut të Greqisë, por u mposht në fund me rezultat 85-74.

Kundërshtari i Trepçës në shtatë ndeshjet e fundit ka vetëm një fitore.

Një sfidë e vështirë e pret edhe Bashkimin ku ka udhëtuar në Itali për t’u përballur me Reggianan. Përballja mes këtyre dy skuadrave fillon nga ora 20:00.

Bashkimi sfidën e parë e humbi nga Cibona me rezultat 93-79, ndërsa italianët e mposhtën Dijonin 96-88 pas vazhdimeve./Arbresh.info