Tifozët e Real Madridit, që blenë bileta për stadiumin “MetLife” në New Jersey, e shikuan me mosbesim ekipin e tyre duke u shkatërruar nga rivali i qytetit, Atletico Madridi. Megjithatë, zemërimi i tyre u shtua edhe më shumë nga veprimet e një tifozi të Barcelonës.

Skuadra e Zinedine Zidane e pësoi golin e parë nga gjithsej shtatë të ndeshjes qysh në minutën e parë dhe pjesa e parë u mbyll me epërsi me rezultat 5:0 për Atletico Madridin.

Diego Costa e shënoi golin e tij të katërt për dërguar rezultatin në 6:0 në fillim të pjesës së dytë, para se Vitolo ta shënonte edhe golin e shtatë për Atletico Madridin në minutën e 70-të. Real Madridi pastaj i shënoi tri gola para fundit, mirëpo tifozët s’ishin të lumtur me disfatën 7:3.

Për ta përkeqësuar edhe më shumë gjendjen për tifozët e Real Madridit, një tifoz i Barcelonës vendosi t’i provokojë tifozët e “Los Blancos” duke ecur nëpër tribunat e stadiumit me fanellën e Lionel Messit në duar.

Ky veprim i zemëroi “Madridistat”, të cilët reaguan duke e ofenduar dhe fishkëllyer tifozin e Barcelonës, si dhe duke e gjuajtur atë me pije.

Por, një gjë e tillë nuk e pengoi tifozin e argjentinasit Messi. Ai vazhdoi duke ecur lart shkallëve duke e mbajtur lart fanellën e Messit.

Turneu parasezonal nuk ka filluar në mënyrën më të mirë të mundshme për Real Madridin. Ata e humbën ndeshjen e parë me rezultat 3:1, kundër Bayern Munichut, ndërsa Arsenalin e mposhtën vetëm përmes gjuajtjes së penalltive, pasi barazuan 2:2 në kohë të rregullt.

Barcelona fan holding a Messi shirt made Real Madrid fans lose their heads during the Atletico match ?

He was lucky to make it out alive ?#FCB #RMCF pic.twitter.com/DFjh2cx54y

— GiveMeSport Football (@GMS__Football) July 29, 2019

Këto rezultate janë shqetësuese për tifozët e “Los Blancos”, pasi që madrilenët kanë shpenzuar shumë para këtë verë për ta përforcuar skuadrën. Eden Hazardi dhe bashkëlojtarët e tij do të tentojnë të kthehen me fitore sonte, në ndeshjen kundër Tottenhamit. /Gazeta Express/