Trajneri i Juventusit, Thiago Motta shprehu kënaqësinë e tij për lëvizjen e pritur të sulmuesit francez, Randal Kolo Muani nga Paris Saint-Germain, duke thënë se ai shpreson që lojtari të jetë i disponueshëm kur ata të presin Milanin në Serie A të shtunën.

Kolo Muani pritet t’i bashkohet Zonjës së Vjetër në një marrëveshje huazimi deri në fund të sezonit, por ende nuk janë zbuluar detaje të kontratës nga klubet.

“Jam i lumtur me ardhjen e Kolo Muanit”, deklaroi Motta në një konferencë për shtyp të premten.

“Ne presim vetëm disa dokumente përfundimtare për të kompletuar transferimin. Nëse gjithçka shkon sipas planit, ai do të jetë me ne nesër, përndryshe do ta kemi atë nga ndeshja tjetër”.

Kolo Muani, një lojtar i rregullt në skuadrën e Francës së Didier Deschamps, ka qenë jashtë favorit te skuadra e PSG- së e Luis Enrique, duke bërë dy starte në ligë këtë sezon, pavarësisht se e hapi sezonin me dy gola në tri ndeshjet e para.