Kylian Mbappe nuk e ka përtypur dot humbjen e Real Madridit në transfertën ndaj Benficës.

Sulmuesi francez ka shfaqur hapur zhgënjimin e tij pas ndeshjes, duke kritikuar mungesën e vazhdimësisë në lojën e skuadrës madrilene.

“Nuk ka vazhdimësi në lojë dhe duhet ta zgjidhim këtë problem. Nuk mund të jesh një ditë brilant dhe ditën tjetër të zhdukesh krejtësisht. Kjo nuk është e denjë për një skuadër që pretendon të fitojë Champions League”, ka deklaruar Mbappe.

Ylli francez nuk ka kursyer kritikat as për golin e katërt të pësuar nga Real Madridi, i cili u shënua nga portieri i Benfikës, Anatoliy Trubin.

“Ai gol i katërt… është vërtet një turp”, shtoi Mbappe, duke reflektuar zhgënjimin për mënyrën se si u mbyll ndeshja.

Humbja 4-2 në Portugali e ka nxjerrë Real Madridin jashtë tetë skuadrave të para në renditje, duke i detyruar spanjollët që të vazhdojnë rrugëtimin në Champions League përmes fazës së play-off-it, një situatë aspak e zakonshme për gjigantët madrilenë./rtk