Rekord për Elseid Hysajn, kalon edhe Lorik Canën me paraqitje

21:35 | 14 Tetor 2025
D.H

Elseid Hysaj ka hyrë zyrtarisht në histori, duke u bërë lojtari me më shumë paraqitje në Kombëtaren e Shqipërisë.

Shkodrani ka arritur shifrën rekord prej 94 ndeshjesh, duke kaluar çdo emër tjetër që ka veshur fanellën e Shqipërisë. 31-vjeçari u inkuadrua në minutën e 77-të në miqësoren ndaj Jordanisë, duke shijuar këtë moment të veçantë në karrierën e tij.

Në ndeshjen e kaluar kundër Serbisë, Hysaj kishte barazuar rekordin e Lorik Canës, me nga 93 ndeshje me “kuqezinjtë”.

Që nga debutimi i tij në vitin 2013, Hysaj është bërë një shtyllë e mbrojtjes dhe një lider i vërtetë në fushë, duke kontribuar në arritjet më të mëdha të Kombëtares, përfshirë pjesëmarrjen historike në Euro 2016 dhe Euro 2024.

Me këtë rekord, Elseid Hysaj vulos emrin e tij në librin e artë të Kombëtares shqiptare dhe mbetet një figurë kyçe për ekipin edhe për të ardhmen.