Real Madridi ka nisur një etapë të re, vetëm 24 orë pasi Xabi Alonso u shkarkua nga posti i trajnerit të ekipit të parë. Në vend të tij është emëruar Álvaro Arbeloa, i cili deri më tani drejtonte Castillan. Arbeloa ka një miqësi të ngushtë me trajnerin tolosar, por tashmë nuk ka pothuajse aspak kohë për t’u përgatitur për debutimin e tij në stolin e ekipit të parë.

Sfida e parë për të do të jetë këtë të mërkurë, nga ora 21:00, kur Real Madridi do të përballet me Albaceten në stadiumin “Carlos Belmonte”, në kuadër të fazës së 1/8-ve të finales së Kupës së Mbretit. Klubi madrilen ka vendosur tashmë edhe mënyrën e udhëtimit drejt tokave manchege, pasi në raundin e mëparshëm kishte udhëtuar drejt Talaverës (2-3).

Sipas asaj që raporton Defensa Central, Reali do të udhëtojë drejt Albacetes po në ditën e ndeshjes. Është hedhur poshtë mundësia e udhëtimit me AVE apo autobus dhe është zgjedhur avioni, praktikë kjo e zakonshme për klubin nga “Concha Espina”, përveç rasteve kur ka pengesa logjistike. Ekipi, tashmë nën drejtimin e Arbeloas, si dhe drejtuesit e klubit, do të nisen nga aeroporti “Adolfo Suárez Madrid-Barajas” drejt aeroportit të “Los Llanos”. Distanca mes dy qyteteve është rreth 250 kilometra, ndërsa udhëtimi me avion zgjat vetëm rreth gjysmë ore.

Ende nuk dihet ora e saktë e mbërritjes së Real Madridit në Albacete, por pritet që delegacioni të aterrrojë në mesditë. Pas mbërritjes, skuadra do të ndjekë rutinën e zakonshme të përqendrimit para ndeshjes, e cila do të luhet në një “Carlos Belmonte” plot e përplot. Abonentët e Albacetes kanë tërhequr tashmë edhe biletat e fundit, duke bërë që stadiumi të presë rreth 17.500 tifozë për këtë ngjarje të veçantë për vendasit.

Rikthim në Albacete pas 21 vitesh

Kjo e mërkurë do të jetë shumë emocionale për Real Madridin, i cili rikthehet të luajë në “Carlos Belmonte” pas 21 vitesh. Hera e fundit ishte më 3 prill 2005, në një ndeshje kampionati, kur Albacete ishte pjesë e La Ligës. Atëherë, vendasit ia vështirësuan shumë punën madrilenëve, por Reali arriti të përmbysë rezultatin me gola nga Iván Helguera dhe Michael Owen (1-2).

Në total, dy skuadrat janë përballur 14 herë dhe Real Madridi nuk ka pësuar asnjë humbje, me 11 fitore dhe 3 barazime.

Reali nuk dëshiron surpriza dhe synon të vazhdojë rrugëtimin e tij në Kupën e Mbretit këtë sezon. Për më tepër, kjo ndeshje shënon debutimin e Arbeloas si trajner i ekipit të parë, çka i shton edhe më shumë interes sfidës. Pas përfundimit të takimit, skuadra do të kthehet sërish me avion drejt Madridit.

Vëmendja do të jetë edhe te gjendja e të dëmtuarve, veçanërisht te Kylian Mbappé. Francezi, i cili pati minuta loje ndaj Barcelonës (3-2) në finalen e Superkupës së Spanjës, vazhdon të ketë shqetësime në këmbën e majtë dhe mbetet për t’u parë nëse do të udhëtojë me ekipin.