Real Madrid ka vazhduar formën e mirë në “Santiago Bernabeu”, duke regjistruar fitoren e tetë radhazi në shtëpi në La Liga pas triumfit 3-1 ndaj Villarreal, gjë që i ka rikthyer madrilenët në krye të tabelës.

Pas humbjes në derbin ndaj Atletico Madrid, skuadra e Xabi Alonso ka kërkuar reagim të menjëhershëm, dhe që në minutat e para ka treguar dominim të plotë.

Arda Guler i është afruar golit pas një kombinimi me Kylian Mbappe, ndërsa rastet kanë vijuar me goditjet e Tchouameni dhe Mastantuono. Villarreal është munduar të kundërsulmojë përmes Tani Oluwaseyi, por Courtois ka reaguar me shpejtësi për të shmangur golin.

Pjesa e parë është mbyllur pa gola, por Real e ka gjetur shpejt avantazhin në fillim të pjesës së dytë. Vetëm pas dy minutash lojë, Vinicius Junior ka depërtuar nga e majta dhe goditja e tij është devijuar nga Santi Comesaaa, duke përfunduar në rrjetë. Braziliani ka shënuar sërish pas pak minutash nga pika e bardhë e penalltisë, pas një kontakti me Rafa Marin, duke dyfishuar rezultatin.

Pas këtij momenti, Real Madrid e ka dominuar ndeshjen dhe vetëm pritjet e portierit Tenas e kanë ndalur Bellinghamin nga realizimi. Megjithatë, në minutën e shtatëdhjetë, Georges Mikautadze e ka ngushtuar diferencën me një goditje të fortë që ka kaluar Courtois, duke rikthyer përkohësisht emocionet. Megjithatë, shpresat e Villarreal janë shuar shpejt kur Santiago Mourino e ka marrë kartonin e dytë të verdhë për një shtyrje të Vinicius, duke lënë skuadrën me dhjetë lojtarë.

Në minutën e tetëdhjetë e një, Kylian Mbappe e ka vulosur fitoren me golin e tretë pas një kombinimi me Brahim Diaz, duke shënuar golin e tij të katërmbëdhjetë në dhjetë paraqitje në të gjitha garat.

Me këtë fitore, Real Madrid e zgjat serinë pozitive ndaj Villarrealit në pesë ndeshje pa humbje (katër fitore dhe një barazim), ndërsa skuadra e Marcelino sheh t’i ndërpritet seria e tri fitoreve radhazi në kampionat./rtk