Po kalonte në formë të shkëlqyer, Muslija humb pjesën e mbetur të sezonit pas lëndimit të rëndë

16:18 | 12 Prill 2026
D.H

Mesfushori i kombëtares së Kosovës, Florent Muslija ka marrë një lajm të keq pas dëmtimit të tij në ndeshjen e fundit.

Klubi ku ai luan, Fortuna Dusseldorf e ka konfirmuar se ai ka këputur ligamentin e kryqëzuar në gjurin e djathtë gjatë ndeshjes ndaj Holstein Kiel, të zhvilluar të premten, shkruan Arbresh.info.

Mesfushori ofensiv u lëndua në pjesën e dytë, pasi mbeti i bllokuar në fushë gjatë një dueli.

Ai mori trajtim për disa minuta dhe u largua nga fusha vetëm me ndihmën e stafit mjekësor.

“Ekzaminimet e kryera nga mjeku i ekipit, Dr. Ulf Blecker, në bashkëpunim me partnerin radiologjik të klubit, konfirmuan diagnozën e rëndë, e cila nënkupton fundin e sezonit për lojtarin kosovar”, ka bërë të ditur klubi gjerman përmes një njoftimi në sajtin e tyre.

Në 30 ndeshje të luajtura këtë edicion me klubin ai ka realizuar pesë gola dhe ka dhuruar gjashtë asistime./Arbresh.info