KB Peja nuk do ta luajë ndeshjen në kuadër të Ligës ENBL, e cila ishte e paraparë të zhvillohej sot në Çeki.

Ekipi i Superligës së Kosovës, të martën ka bërë të ditur se nuk do të udhëtojë në Çeki pasi e ka të pamundur një gjë të tillë për shkak të orarit të ngjeshur në garat vendore.

Peja, sot prej orës 18:00 është dashur të përballet në udhëtim me skuadrën Olomoucko, e cila sikurse ekipi kosovar i ka vetëm katër ndeshje të luajtura deri më tani në ligën ENBL.

“Ndeshja e GO+ Peja që ishte e paraparë të luhet sot në kuadër të ENBL përballë Olomuockos në udhëtim në Çeki, nuk do të zhvillohet.  Për shkak të orarit shumë të ngjeshur në garat vendore, ka qenë i pamundur udhëtimi në Çeki – pasi skuadra jonë zhvillon ndeshje të enjten dhe të shtunën”, thuhet në njoftimin e Pejës.

Pas katër ndeshjeve të luajtura në ligën ENBL, Peja renditet e parafundit me 5 pikë pasi ka regjistruar tri humbje e një fitore.

Krahas Pejës, në ligën ENBL po paraqitet edhe Sigal Prishtina që ka tubuar 11 pikë pas 7 ndeshjeve të luajtura dhe përballjen e radhës e zhvillon javën e ardhshme.