Laçi është finalistja e parë e Kupës së Shqipërisë.

Kurbinasit bën surprizën e madhe në sfidën e kthimit të zhvilluar në stadiumin “Zeqir Ymeri” duke eleminuar në fazën e gjysmëfinaleve skuadrën e Kukësit.

Skuadra e drejtuar nga tekniku Gentian Mezani, arriti që të kualifikohet për në finale pasi sfida e sotme u mbyll me rezultatin e barabartë 1-1, ndërsa ndeshja e parë ishte mbyllur me shifrat 0-0.

Një kualifikim i merituar për Laçin të cilët nuk u dorëzuan për asnjë moment edhe pse u gjendën të parët në disavantazh.

Sindrit Guri shënoi golin e parë të takimit në minutën  e 20-të të pjesës së parë, duke shëndërruar ne gol një 11 metërsh të fituar po nga ai duke e mbyllur  pjesën e parë në avantazh.

Në pjesën e dytë miqtë u hodhën të gjithë në sulm për të gjetur golin e barazimit, që do të vinte në minutën e 78-të me anë të sulmuesi Rexhinaldo që shënoi brenda zonës duke mposhtur Frashërin.

Gjithçka u mbyll me rezultatin e barabartë 1-1 që dërgoi në finale ekipin e Laçit.

Në orën 18:30 luhet sfida tjetër gjysmëfinale e Kupës së Shqipërisë që është mes Flamurtarit dhe Skënderbeut që luhet në Vlorë. Ndeshja e parë ka përfunduar me shifrat 1-0 në favor të kuqezinjve.