Një medalje është shumë afër për Kosovën në turneun prestigjioz WKF Karate-1 Premier League, që po mbahet në Stamboll. Garuesja kosovare Vlera Qerimi ka pasur paraqitje të suksesshme dhe do të luftojë për medaljen e bronztë.

E përfaqësuar nga Vlera Qerimi dhe Fortesa Orana, Kosova e ka nisur mirë vitin në këtë garë të nivelit të lartë botëror.

Vlera Qerimi shkëlqeu që në fazën e grupeve, të cilën e ka përfunduar në vendin e parë, duke treguar formë të lartë konkurruese.

Në çerekfinale, ajo ka shënuar fitore bindëse me rezultat 8:0, duke siguruar kualifikimin në gjysmëfinale. Në këtë fazë, Vlera është përballur me sportisten egjiptiane Hendy Hadir, nga e cila është mposhtur ngushtë me rezultat 3:2.

Megjithatë, rrugëtimi i saj nuk ka përfunduar, pasi të dielën do të ndeshet për medaljen e bronztë, me shpresë që Kosova ta mbyllë këtë turne me medalje.

Ndërkohë, Fortesa Orana ka pasur paraqitje të mirë, por nuk ka arritur të kalojë fazën e grupeve.

Federata e Karatesë e Kosovës ka vlerësuar paraqitjen e sportistëve dhe u ka uruar suksese të mëtejme, duke theksuar se Kosova po vazhdon të dëshmojë forcë dhe cilësi në arenën ndërkombëtare të karatesë.