Gonzalo Higuain ka mbyllur një tjetër sezon zhgënjyes me Juventusin dhe bardhezinjtë duket se kanë vendosur ta largojnë përfundimisht këtë verë, për të shpëtuar nga paga e tij e lartë, por edh për të arkëtuar sadopak nga shitja e tij, duke qenë se verën e ardhshme i përfundon kontrata.

Megjithatë nuk është i këtij mendimi babai i sulmuesit argjentinas, Jorge Higuain, i cili në një intervistë për mediat vendase theksoi se futbollisti do të respektojë kontratën me Juventusin dhe më pas do të transferohet diku tjetër.

“Nuk është e vërtetë që nuk e duan më, besoj se do të përfundojë kontratën me skuadrën e Juves. Është gati e pamundur që të luajë për River Plate sezonin e ardhshëm, pasi nuk do të heqë dorë nga kontrata e tij, për të shkuar si futbollist i lirë në një skuadër tjetër. Do të përfundojë detyrimet ndaj Juves dhe më pas do të shohim ku do të vijojë karrierën”, u shpreh Jorge Higuain.