Ballkani e ka fituar ndeshjen e parë të rrethit të dytë kualifikues për Ligë të Konferencës ndaj Florianas, me rezultat 4-2.

Ndeshja nisi më mirë për mysafirët që realizuan në minutën e tetë me anë të Jake Grech, nga penalltia, shkruan Arbresh.info.

Pas pesë minutash, Bleart Tolaj barazoi për Ballkanin.

Floriana u rikthye në epërsi sërish me golin e Mustapha Jan në minutën e 25-të.

Por pas vetëm dy minutash, Sunday Adetunji barazoi sërish rezultatin.

Ballkani arriti ta shënoj edhe golin e tretë dhe të epërsisë në minutën e 32-të, ku shënoi sërish Tolaj, pas një asistimi nga Adetunji.

Ndërkohë në fund të pjesës ndodhi diçka e pazakontë ku u fikën dritat e reflektorëve si pasojë e mungesës së energjisë elektrike në stadium. Kjo bëri që pjesa e parë të përfundoi pak më herët dhe nuk u luajtën të gjithë minutat shtesë.

Pas këtyre problemeve, pjesa e dytë nisi dhe përfundoi pa telashe.

Në 45 minutëshin e dytë u shënua vetëm një gol, të cilin e realizoi Adetunji në minutën e 76-të.

Deri në fund nuk pati gola tjerë dhe Ballkani shënoi fitore komode, duke i dhënë shanse të mëdha për kualifikim.

Ndeshja e kthimit luhet javën e ardhshme në Maltë./Arbresh.info