Erza fitoi edhe një medalje të bronztë Olimpike, këtë herë në ekipore

07:21 | 11 Tetor 2018
Arbresh.info

Erza Muminoviqi ka fituar edhe një medalje të bronztë Olimpike në Lojërat Olimpike për të rinj, Buenos Aires 2018.

Xhudistja jonë këtë herë fitoi të bronztën në garat ekipore mikse të krijuara nga organizatorët dhe të emërtuara sipas qyteteve ku janë organizuar Lojërat Olimpike.

Erza me ekipin e saj Rio de Janeiro, fituan të bronztën pas dy fitoreve ndaj Sydneyt dhe Atlantas, ndërsa u mposhtën në gjysmëfinale nga Athina.

Erza në gjysmëfinale u mund sërish nga Devi Tangjam e Indisë, nga e cila ishte mposhtur edhe të dielën në individuale, kategoria -44 kilogramë.

Luftën e parë, xhudistja jonë e fitoi ndaj rumunes Giorgia Hagianu, ndërsa humbi në të dytën nga Vusala Karimova e Azerbajxhanit.

Kujtojmë që të dielën, Erza fitoi medaljen e bronztë, të parën për Kosovën në LOR Buenos Aires 2018, në të cilat Kosova po merr pjesë për herë të parë.