Neymari e ka pranuar se nuk është shembulli i përkryer për t’u ndjekur dhe as superhero, pasi është ndërruar në një figurë kontroverse që prej se iu bashkua Paris Saint-Germainit më 2017.

Edhe pse një figurë kontroverse, braziliani këmbëngul se gjithmonë përpiqet të veprojë me ndërgjegje, transmeton Gazeta Express.

Neymari i ka kaluar gati dy vjet me PSG-në, por thashethemet për palumturinë e tij, marrëdhëniet e tensionuara me bashkëlojtarët dhe mungesën e përkushtimit e kanë prishur periudhën e tij në Ligë 1.

Së fundmi, 27-vjeçari nuk raportoi në klub për mungesën në stërvitjet parasezonale në fillim të këtij muaji, mu në një kohë kur nisen thashethemet se ai po e kërkon kthimin në Barcelonë.

Në të njëjtën kohë, drejtori sportiv i PSG-së, Leonardo konfirmoi se Neymar është në treg dhe i arritshëm për çmimin e duhur.

Braziliani është i vetëdijshëm për ndikimin e ngjarjeve të viteve të fundit në reputacionin e tij.

“Nuk jam superhero e as shembull i përkryer për t’u ndjekur. Edhe unë i kam momentet e këqija, kur dua të shkoj në shtëpi dhe të fshihem, për të qëndruar më miqtë dhe familjen”, ka thënë Neymar.