Policia katalanase, ka hapur hetime për një rast të dyshuar të sulmit seksual që dyshohet se ka ndodhur në Barcelonë.

Sipas raportimit të medias ABC, i përfshirë në këtë rast dyshohet të jetë Fatinho Jr., vëllai i futbollistit të Monacos, i huazuar nga Barcelona, Ansu Fati, përcjell Arbresh.info.

Ngjarja thuhet se ka ndodhur në orët e para të mëngjesit të 8 shkurtit, në banesën e futbollistit Lamine Yamal, pasi viktima – një vajzë me shtetësi holandeze – kishte qenë më herët në diskotekën Shoko, së bashku me personat e përfshirë dhe disa miq të tjerë.

Viktima ka deklaruar se është prekur pa pëlqimin e saj dhe ka shprehur dyshime se mund të ketë qenë nën ndikimin e ndonjë substance, duke ngritur dyshime për përdorim të mundshëm të substancave për nënshtrim kimik. Pas ngjarjes, ajo është dërguar në spital, ku i është nënshtruar ekzaminimeve mjekësore përkatëse.

Në raportin fillestar policor përmendet gjithashtu se ajo dyshohet se ka qenë viktimë edhe e dhunës fizike, konkretisht një shuplakë. Deri tani, viktima nuk ka paraqitur kallëzim zyrtar, por autoritetet kanë konfirmuar se hetimet janë në vazhdim për të sqaruar plotësisht rrethanat e ngjarjes.

Rasti mbetet i hapur dhe priten zhvillime të reja nga organet hetuese.