Portieri i PSG-së dhe Italisë, Gianluigi Donnarumma, ka folur për incidentin e tmerrshëm që ndodhi në shtëpinë e tij në Paris këtë javë.

Donnarumma dhe e dashura e tij, Alessia Elefante, u lidhën teksa hajdutët grabitën shtëpinë në kryeqytetin francez.

Donnarumma u sulmua gjithashtu gjatë incidentit.

Grabitja ka ndodhur në orën 3 të mëngjesit të së premtes.

Është raportuar se hajdutët kanë vjedhur sende me vlerë rreth 500 mijë euro.

Donnarumma foli për ngjarjet, duke i thënë Libero:

“Të gjesh papritur njerëz në shtëpi në orën tre të mëngjesit, mendoj se është ndjenja më e keqe e mundshme. Unë isha i lidhur dhe Alessia u detyrua të jepte gjithçka me vlerë që kishim. Nuk mund të hyj në detaje sepse hetimi është në vazhdim, na u desh të largoheshim nga banesa për të lejuar hetimin, jemi duke qëndruar në hotel. Kisha shumë frikë për Alessia-n se mos i ndodhte diçka. Isha i pafuqishëm, i lidhur, nuk mund të bëja asgjë. Gjithashtu, nuk e zotëroja plotësisht frëngjishten, ndaj ishte e vështirë t’u shpjegoja këtyre njerëzve se ku ishin gjërat.”

Donnarumma nuk është lojtari i parë i PSG-së që është grabitur në vitet e fundit, me lojtarë si Angel Di Maria, Marquinhos, Thiago Silva dhe Mauro Icardi gjithashtu viktima të grabitjeve./Arbresh.info/