Real Madrid e ka nisur me dy fitore dhe pa pësuar gola sezonin e ri në La Liga, një start që sipas portierit belg Thibaut Courtois tregon ndikimin e menjëhershëm të trajnerit të ri, Xabi Alonso.

Courtois tha se rezultatet e para janë një kombinim i qasjes sulmuese dhe presionit të lartë të kërkuar nga Alonso, që i ka dhënë skuadrës një strukturë të fortë në të dyja fazat e lojës.

“Kemi arritur dy fitore shumë të rëndësishme. Të fitosh jashtë fushe dhe pa pësuar gol është e rëndësishme. E dinim që fillimi i sezonit do të ishte i vështirë, por deri më tani jemi paraqitur mirë”, tha Courtois.

Portieri belg theksoi se qasja taktike e re është ndjerë menjëherë. “Ai na kërkoi që në fillim të fillonim fort, me shumë presion sulmues dhe lojë mbrojtëse. Nëse bëni presion lart, kundërshtari nuk ka shanse dhe është i detyruar të luajë me topa të gjatë. Pastaj unë ose një mbrojtës e rifitojmë shpejt topin për të sulmuar përsëri”, tha ai.

Courtois shtoi se roli i tij ka ndryshuar ndjeshëm nën drejtimin e Alonso-s. “Trajneri më kërkon të luaj më përpara, kështu që shpesh jam në qendër të fushës. Është mënyra për të mbështetur ekipin kur ai bën presion lart. Deri tani kjo ka funksionuar mjaft mirë”, theksoi ai./rtk