Chelsea e ka rigjetur rrugën e fitores në mënyrë mbresëlënëse duke e mposhtur Burnleyn 4-0 në Premierligë të dielën pasdite.

Djelmoshat e Mauricio Sarrit, që vinin nga një barazim dramatik ndaj Manchester Unitedit javën e kaluar, thyen akullin pas vetëm 22 minutave lojë, kur Alvaro Morata shënoi për 1-0.

Fitorja e thellë në udhëtim, i ndihmon të kaltërve të ngrihen në vendin e dytë në Premierligë, të paktën momentalisht, me vetëm dy pikë larg liderit Liverpoolit.

Në një ndeshje të dominuar dhe kontrolluar plotësisht nga mysafirët, Ross Barkley dyfishoi epërsinë me një super gol nga distanca kur akrepat shënonin një orë lojë.

Vetëm pesë minuta më pas, anësori brazilian Willian shënoi gol pak a shumë të ngjashëm, ndërs Loftus-Cheek e fundosi kundërshtarin me një gol në sekondat e fundit të takimit.

Humbja e lë Burnleyn në vendin e 14-të, me tetë pikë.