Pas kthimit te Bianconerët, Leonardo Bonucci e ka quajtur Juventusin shtëpi të tij.

Mbrojtësi italian u largua para 12 muajsh nga kampioni italian për t’iu bashkuar Milanit, ku u bë edhe kapiten.

Në gjashtë sezonet e mëparshme te bardhezinjtë, ai i fitoi gjashtë Scudetto radhazi. Mirëpo, në edicionin 2016/2017 i prishi raportet me trajnerin Massimiliano Allegri dhe disa lojtarë të Juves.

Sidoqoftë, pas vetëm një sezoni në San Siro, Bonucci është khtyer në Torino, si pjesë e një marrëveshjeje të shkëmbimit me Mattia Caldaran, ndërkohë që edhe Gonzalo Higuain është huazuar te Milani.

Pritet të shihet se si do të jetë reagimi i tifozëve në tribuna, kur Bonucci të luajë sërish me fanellën bardhezi.

Shumë pak tifozë e kanë mirëpritur kthimin e 31-vjeçarit te Zonja e Vjetër, derisa disa e kishin fishkëllyer gjatë arritjes në zyrat e Juventusit.