Bashkimi ka shënuar fitore në ndeshjen e parë të fazën e ‘Play-Off’ të Superligës së Kosovës në basketboll.

Prizrenasit kanë triumfuar para shijuesve të vetë në palestrën ‘Sezai Surroi’ kundër pejës me rezultat të thellë 116:87.

Portokallezinjtë treguan superioritet kundër skuadrës pejane, e cila ditë më parë i ka liruar pothuajse të gjithë basketbollistët më të mirë si pasoj e një krize financiare që ka kapluar ‘Shqiponja’, transmeton telegrafi.

Qysh në çerekun e parë vendasit krijuan një epërsi të lartë prej 12 pikëve duke e përfunduar dhjetë minushtin e parë me rezultat 34:24.

Por, në çerekun e dytë pejanët shfaqën një ndeshje më të bukur dhe si rezultat i kësaj shkrin epërsinë e vendasve duke e mbyllur pjesën e dytë me disavantazh prej tre pikëve, 50:47.

Megjithatë, ‘Arpagjik’t’ shtrënguan radhët e veta dhe rikthyen avantazhin e lartë duke e përfunduar çerekun e tretë me rezultat 82:68.

Në periudhën e fundit, vendasit menaxhuan rezultatin dhe kështu triumfuan me rezultat 116:87.

Më i miri te Bashkimi ishte J.Black me 35 pikë ndërsa te mysafirët shkëlqeu Abramovic që realizoi 25 sosh.

Seria tash vazhdon në Karagaç të Pejës, ku do të zhvillohen dy ndeshjet e radhës. Ekipi që arrin tre fitore së pari, kualifikohet në finale të Play-Off. Në rast se nuk zgjidhet fituesi pas dy ndeshjeve të radhës, atëherë seria në dy ndeshjet e fundit (të katërtën dhe të pestën) bartet në Sezai Surroi.