Barcelona po përgatit një ofensivë të madhe në merkato, duke synuar disa prej lojtarëve kryesorë të Tottenham Hotspur në rast se klubi londinez bie nga Premier League.

Sipas raportimeve nga Diario Sport, katalanasit po monitorojnë nga afër situatën e Spurs, të cilët ndodhen në një betejë të vështirë për mbijetesë.

Një rënie eventuale në Championship mund të detyrojë klubin anglez të shesë yjet e tij me çmime më të ulëta, një mundësi ideale për Barcelonën, që vazhdon të përballet me kufizime financiare.

Në krye të listës është Xavi Simons, produkt i akademisë së famshme La Masia. Rikthimi i tij në “Camp Nou” do të ishte simbolik, ndërsa ai konsiderohet si një nga lojtarët më kreativë në mesfushën e Tottenhamit.

Po ashtu, në radar është edhe talenti suedez Lucas Bergvall, i cili ishte shumë pranë Barcelonës para se të zgjidhte Tottenhamin. Pavarësisht problemeve me lëndimet, drejtuesit katalanas besojnë ende në potencialin e tij të madh.

Në repartin defensiv, trajneri Hansi Flick kërkon përforcime dhe dy emrat kryesorë janë Micky van de Ven dhe Cristian Romero. Të dy konsiderohen si mbrojtës të nivelit të lartë që do të rrisnin konkurrencën në prapavijën e Barcelonës.

Van de Ven shihet si një profil ideal për të formuar një dyshe të fortë me talentin e ri Pau Cubarsi, falë shpejtësisë dhe aftësisë për të ndërtuar lojën nga mbrojtja.

Emri i pestë në listë është mbrojtësi i krahut Pedro Porro, i cili përshtatet me stilin ofensiv të Barcelonës. Megjithatë, transferimi i tij mund të varet nga e ardhmja e Jules Kounde, për të cilin klubi është i hapur ndaj ofertave këtë verë.

Gjithçka mbetet e lidhur me fatin e Tottenhamit në kampionat.

Nëse ndodh e papritura dhe Spurs bien nga liga, pritet një “eksod” i lojtarëve dhe një verë e nxehtë në tregun e transferimeve, ku Barcelona do të përballet me konkurrencë të fortë nga klubet e tjera evropiane./Arbresh.info