Arsenali interesohet për Kenan Yildiz, Juventusi e vlerëson mbi 100 milionë euro

10:05 | 25 Shtator 2025
H.E

Kenan Yildiz po kalon një formë të shkëlqyer me Juventusin.

20-vjeçari turk, i cili mund të luajë si sulmues qendror, mesfushor ofensiv apo anësor, sezonin e kaluar spikati me 12 gola dhe nëntë asiste, ndërsa këtë edicion e ka nisur sërish fuqishëm me dy gola dhe katër asistime në vetëm pesë paraqitje.

Paraqitjet mbresëlënëse të talentit kanë tërhequr vëmendjen e Arsenalit.

Skuadra e Mikel Artetës ka kontaktuar Juventusin për një transferim të mundshëm në të ardhmen, megjithatë klubi italian nuk ka ndërmend të heqë dorë nga lojtari.

Bardhezinjtë e vlerësojnë Yildiz mes 100 dhe 120 milionë eurove dhe synojnë ta blindojnë me një kontratë të re afatgjate.

Marrëveshja aktuale e tij është e vlefshme deri në vitin 2029, por Juventus është i përgatitur të ofrojë kushte të përmirësuara për ta mbajtur një nga talentët më premtues të futbollit evropian në Torino. /Telegrafi/