Andi Zeqiri ishte lojtari më i padëshiruar nga tifozët “Dardanët” në ndeshjen e sontme mes Kosovës dhe Zvicrës e zhvilluar në Cyrih.

Zeqiri fillimisht i kishte thënë po Kosovës, ndërsa më vonë vendosi ta përfaqësonte Zvicrën.

Kjo acaroi tej mase tifozët kosovarë, të cilët edhe e shpallën “non grata”, ndërsa sonte nuk munguan vërshëllimat për të. Ai u inkuadrua në lojë në minutën e 81-të të ndeshjes.

Pas sfidës, ai komentoi vërshëllimat e tifozëve dhe gjithashtu foli për vendimin e tij për ta veshur fanellën helvetike.

“Unë i kuptoj tifozët sepse ata duan lojtarët më të mirë për Kosovën. Unë jam shqiptar nga Kosova dhe në çdo vit vij në Ferizaj. Ka qenë vendim i imi për ta prezantuar Zvicrën, por gjithmonë do të jem një djalë i Kosovës dhe do t’i gëzohem suksesit të Kosovë gjithmonë, sikurse të Zvicrës ku edhe luaj. Ka qenë një ndeshje shumë emocionuese. Thirrjet dhe banderolat e tifozëve i kam marr me sportivitet, pasi jam një lojtar profesionisT. Fanellën nuk e ndërrova me asnjë lojtarë të Kosovës, pasi është shumë e rëndësishme për mua, sepse vjen nga një ndeshje si ajo Zvicër – Kosovë”, ka thënë Zeqiri për Telegrafin.

22-vjeçari luan për Augsburgun në Gjermani si i huazuar nga Brighton.